சிந்தாநதி

தமிழ்ப் பதிவுலகை உலுக்கிப் போட்ட பதிவர் பட்டறை சென்னையில் நடந்து முடிந்திருக்கிறது. பட்டறையில் நடைபெற்ற ஆக்கப் பூர்வமான செயல்களால் உலுக்கிப் போடாமல் பயனற்ற விவாதங்களால் உலுக்கி குலுங்கி உருண்டு புரண்டு ஒரு ரவுண்டு முடிந்து விட்டது. இப்போதைக்கு முடிந்ததாக கொள்ளலாம் என்றாலும் யார் எப்போது மறுபடி ஆரம்பிப்பார் என்று சொல்ல முடியாத ரகத்தைச் சேர்ந்த விவாதங்கள் அவை.

அது கிடக்கட்டும்.

2002 ல் ஆரம்பமான தமிழ் வலைப்பதிவுலகின் இணையப் பயணம் மிக நீண்ண்ண்டது அல்ல. ஐந்து வருடம் கடந்திருக்கிறது அவ்வளவு தான்.

பதிவுகள் சில நூறு கடந்த நிலையிலேயே பதிவர் சந்திப்புகளும் ஆரம்பமாகி விட்டன. யார் முதலில் ஆரம்பித்தார்கள் என்று சரியாக சொல்ல முடியாவிட்டாலும் காசி, பெயரிலி. கார்த்திக், நவன் உள்ளிட்டவர்கள் கலந்து கொண்ட அமெரிக்க வாழ் தமிழ்ப்பதிவர்களின் சந்திப்பு, பின்னர் மதி, டிசே போன்றவர்கள் கலந்து கொண்ட கனடாவாழ் பதிவர்களின் சந்திப்பு போன்றவை பற்றி பதிவுகளில் படித்தது என் நினைவில் இருக்கிறது.

இப்படிப் பெரும்பாலும் வெளிநாடு வாழ் தமிழ்ப்பதிவர்களாலேயே ஆரம்பிக்கப் பட்ட பதிவர் சந்திப்புகள் விடுமுறையில் நாடு திருப்பும் பதிவர்களோடு சந்திப்பாக சென்னையிலும் நடைபெற ஆரம்பமானதாக நினைவு.

தமிழ்நாட்டிலும் உலகின் தமிழ்வலைப் பதிவர்கள் வாழும் பிற நாடுகளிலும் பதிவர் சந்திப்புகள் ஆங்காங்கே நிகழ்ந்தன.

பின்னர் சென்னை வாழ் பதிவர்கள் அவ்வப்போது சந்திப்புகளை நடத்த ஆரம்பித்தனர். பூங்கா சந்திப்புகள், போண்டா சந்திப்புகள் என்று இருந்ததை பாலபாரதி உள்ளரங்க சந்திப்பாகவும் பொருளடக்கத்துடன் கூடியதாகவும் மாற்றினார்.

அடுத்த சந்திப்பு பூங்காவில் நடைபெற்றாலும் சாகரன நினைவு மலருடன் தெளிவான நிகழ்ச்சி நிரலுடன் மீடியா கவரேஜும் தந்த சிறப்பான சந்திப்பாக ஏற்பாடு செய்யப் பட்டது.

இதைத்தொடர்ந்து கோவையில் ஓசைசெல்லா முதலாவது பதிவர் பட்டறைக்கு ஏற்பாடு செய்தார். எதிர்பாராமல் அவரால் நேரில் கலந்து கொள்ள முடியாத சூழலில் அந்த பட்டறையையும் பாலபாரதியே நடத்தி முடித்தார். எனினும் பயிலரங்கை விட இலக்கியம் கலைகள் குறித்த சுவையரங்காகவே அந்த நிகழ்வு அமைந்து விட்டது.

பதிவுலகை அடுத்த கட்டத்திற்கு நகர்த்தியே தீருவேன் என்று முயற்சி மேற்கொண்டிருந்த பாலபாரதி, ஆங்கிலப் பதிவுகளின் பட்டறைப் பொறுப்புகளில் பெற்ற அனுபவத்தால் தமிழிலும் நடத்த ஆர்வம் கொண்டிருந்த விக்கி ஆகியோரின் ஆர்வத்துடன் தமிழ் இணையச் செயல்பாடுகள் பலவற்றில் ஏற்கனவே பங்காற்றி இருந்த மா.சிவகுமார், நிகழ்காலப் பதிவுலக சுறுசுறுப்புத் தேனீ பொன்ஸ் ஆகியோர் இணைந்து சென்னைப் பட்டறைக்கான முதல் வடிவம் கொடுத்தனர். பட்டறைக்கான தள அமைப்பில் தொடங்கி ரவிசங்கரும் பொருளாதார ஆலோசனைகளுடன் பிரகாஷும் பட்டறை ஆலோசனைக்குழுவில் இணைந்து பட்டறைக்கான செயல்வடிவம் உருப்பெறத் துவங்கியது. பட்டறைக்கான சின்னம் உருவாக்க விக்கியால் அழைக்கப் பட்டு நானும், விளம்பர வடிவமைப்புகளில் தொடங்கி லக்கியும் பின்னர் இணைந்து கொண்டோம். பொதுக்குழுமம் ஒன்று அமைக்கப் பட்டு எங்களைத்தவிர பங்கேற்பாளர்களின் ஆலோசனைகளும் பெறப்பட்டன.

பட்டறையில் திறவூற்று தமிழ் மென்பொருள்கள் அடங்கிய சிடி மற்றும் தட்டச்சுக்கான கையேடு ஆகியவை பங்கேற்பாளர்களுக்கு வழங்க வேண்டும் என்ற ஆலோசனையை முன்வைத்த பாலபாரதி, கையேட்டை பத்ரி அச்சாக்கம் செய்து தர ஏற்றதும் அதை எழுதும் பொறுப்பை எனக்களித்தார். கணிச்சுவடி என்று மா.சிவகுமார் பெயர் தந்தார்.

பட்டறை ஏற்பாடுகள் செயலாக்கம் பெற்று ஆகஸ்ட் 5ம் தேதி சென்னைப் பதிவர் பட்டறையாக நடைபெற்று மேலே கண்ட கலவையான உணர்வலைகளை தமிழ் வலைப்பதிவர்களிடையே எற்படுத்தி வைத்திருக்கிறது.

பதிவர் பட்டறை குறித்து இன்று இங்கே எழுதக் காரணம்....
பட்டறைக்காக கணிச்சுவடி என்ற கணித்தமிழ் வழிகாட்டியை எழுதி வந்த வேளை அதற்காக எழுத ஆரம்பித்த பல குறிப்புகள் சுவடியில் சேர்க்க தேவை இல்லாமல் இருந்தது. எனினும் புதியவர்களுக்கு பயன்படும் பல குறிப்புகள் அவை என்பதாலும் குறிப்பிட்ட தலைப்பில் இதுவரை முழுமையான வழிகாட்டி இல்லை என்று சொல்லப் பட்டதாலும் வலைப்பதிவுகள் என்றால் என்ன என்பது தொடங்கி ஒரு தொடராக எழுத இருக்கிறேன்....

உங்கள் ஒத்துழைப்பும் அவ்வப்போது ஆலோசனைகளும் எதிர்பார்க்கிறேன்...

தமிழ்ப்பதிவர்களுக்கு கொண்டாட்டம் தான். வலைப்பதிவர் சந்திப்புகள் என்று யார் தொடங்கினார்கள் என்று தெரியவில்லை. இதிலும் ஆதி எது என்று ஆராயப் புகுந்து வாங்கிக் கட்டிக் கொள்ள நான் தயாரில்லை ;)

இருந்தாலும் சென்னை, மதுரை, டெல்லி என உள்ளூரிலும் அமெரிக்கா ஆஸ்திரேலியா அமீரகம், சிங்கை என உலகின் பல பாகங்களிலும் இருந்து பதிவர் சந்திப்பு பற்றிய பதிவுகள் வரும்போது வாசிக்க ஏற்படும் ஆர்வமும் நாமும் வாசிப்பின் ஊடாக அந்த நிகழ்வுகளில் பங்களிப்பதும் முகம் தெரியாத மனிதர்களை முகாமுகம் காண்பதில் உள்ள ஆர்வமும் எல்லாமே சுவையானவை.

இப்படி வலைப்பதிவர் சந்திப்பாக மட்டுமே இருந்ததை சற்று பயனுள்ளதாக மாற்றி குறிப்பிட்ட நிகழ்வுகளைத் திட்டமிட்டு ஒருங்கிணைத்து பாலபாரதி சென்னை வலைப்பதிவர் சந்திப்புகளில் இன்னொரு மாற்றத்தை உருவாக்கினார். முன்னதாக அமெரிக்க துணைக்கண்டத்திலும் தொழில்நுட்ப அறிமுகங்கள் சார்ந்து ஒரு சந்திப்பு நடந்தது. ஏப்ரல் 22ல் நடைபெற்ற சென்னை பதிவர் சந்திப்பில் சாகரன் நினைவு மலர் வெளியீடு உட்பட நிகழ்ச்சி நிரல்களை திட்டமிட்டு செயல்படுத்தினார்.

அதைத் தொடர்ந்து கோவையில் செல்லா ஏற்பாடு செய்து பாலபாரதியால் மே 20 அன்று நடத்தப் பட்ட நிகழ்வு தொழில் நுட்பரீதியாக பதிவர் சந்திப்பை பதிவர் பட்டறையாக முன்னேற்றியது. டெலிகான்பரன்சிங் உட்பட இந்த பட்டறையில் நுட்ப வசதிகளுடன் பதிவுநுட்ப அறிமுகங்கள் கொடுக்கப் பட்டன.

இதன்மூலம் பதிவர் சந்திப்பு பதிவர் பட்டறையாக மாறி இதோ ஆகஸ்ட் 5 அன்று மாபெரும் பதிவர் திருவிழா நடக்க இருக்கிறது. இது பதிவர்களுக்கும் பதிவராக விரும்புகிறவர்களுக்கும் தொழில் நுட்ப ரீதியாக தமிழ் வலைப்பதிவுகளைப் பற்றி அறிய உதவ இருக்கிறது. வலைப்பதிவர்களுக்கு நுட்ப ரீதியாக ஏற்படும் சந்தேகங்களை தீர்க்கவும் புதியவர்களுக்கு தமிழில் எழுதும் முறைகளை புரிய வைக்கவும் இந்தப் பட்டறை திட்டமிட்டிருக்கிறது.

சென்னைப் பல்கலைக் கழக தமிழ்த் துறையின் மெரினா வளாக அரங்கில் இந்த நிகழ்ச்சி நடைபெறுகிறது. 2007 ஆகஸ்ட் 5 காலை ஒன்பதரை மணி முதல் மாலை ஐந்து மணி வரை இந்த பட்டறை ஒழுங்கு செய்யப் பட்டுள்ளது.

கட்டணம் ஏதும் இல்லை. குறிப்புகள் எடுக்க ஏடு, பேனா முதல் தேநீர், நன்பகல் உணவு வரை அனைத்தும் நிகழ்ச்சி அரங்கிலேயே ஏற்பாடு செய்யப்பட்டிருக்கிறது. வெளியூர் நண்பர்கள் சென்னையில் தங்கும் வசதியும் செய்யப் படுகிறது.

தமிழ் வலைப்பதிவர்களுக்கு நுட்பம் சார்ந்த விசயங்களை அறிமுகம் செய்யவும் புதிதாக வலைப்பதிய விரும்புகிறவர்களுக்கு தமிழில் எழுதுவது முதல் வலைப்பதிவு துவங்குவது வரை செயல்முறைப் பயிற்சி வழங்கவும் திட்டமிடப் பட்டுள்ளது.

இதற்கென tamilbloggers.org என்னும் வலைத்தளம் தொடங்கப் பட்டுள்ளது. தொடர் அறிவிப்புகள் http://www.tamilbloggers.org/blog என்னும் வலைப்பதிவில் வெளியிடப் படுகின்றன. பட்டறையில் பங்கேற்க விரும்பும் நண்பர்கள் தங்கள் பெயர்களை இந்த தளத்தில் பதிவு செய்து கொள்ள வேண்டும்.

மேலும் தமிழில் எழுதவும் இணையத்தில் ஆர்வமும் உள்ள வலைப்பதிவர் அல்லாத நண்பர்கள், மாணவர்களை இந்த பட்டறையில் கலந்து கொள்ள தூண்டலாம். இது தமிழ் வலைப்பதிவர்கள், தமிழில் எழுதக்கூடியவர்கள் பலரை உருவாக்க உங்கள் பங்களிப்பாக இருக்கும்.

சரியாக 12 மணி அளவில் பொன்ஸ் தகவலைச் சொன்னார். எழுதிய பதிவை ப்ப்ளிஷ் செய்து தமிழ்மணத்தில் இணைத்து விட்டு சென்று தொலைக்காட்சியை போடுவதற்குள் ஆரம்பமாகி இருந்தது. மொட்டைத் தலையில் கொஞ்சமே முடிவளர்ந்து இருந்தது. தொலைபேசியில் நேயர்கள் கேட்கும் கேள்விகளுக்கு பதில் சொல்லிக் கொண்டு தலைவர் கம்பீரமாக அமர்ந்திருந்தார்.

தமிழில் வலைப்பதிவுகள் பற்றி கேள்விகள்.

வலைப்பதிவு துவங்குவது, ஆட்சென்ஸ், மாணவர்கள், குழந்தைகளுக்கான பதிவுகள் என்று கேள்விக் கணைகளை அவருக்கே உரிய சிரிப்புடன் எதிர்கொண்டார். அவ்வப்போது மொக்கை போடவும் தவறவில்லை. சில கேள்விகள் அவருக்கு புரியவில்லை போல தோன்றியது.

தமிழ்99 பற்றி ஆரம்பத்தில் கூறியவர் இறுதியில் தமிழில் எளிமையாக தட்டச்சுவது பற்றி கேட்ட போது தமிங்கிலம் பற்றியே அதிகம் விளக்கம் கூறி கொஞ்சம் சொதப்பியதில் கொஞ்சம் வருத்தமுண்டு. (அதுக்காகத்தான் தல சீக்கிரமாக அதை அனுபவ பூர்வமாக கற்றுக் கொள்ளணும்னு சொல்றது.)

இருந்தாலும் வலைப்பதிவு ஆரம்பிப்பது பற்றி நிறைய விசயங்களை புதியவர்களுக்கு எடுத்துச் சொன்னார். சம்பந்தமில்லாத கேள்வி கேட்டவர்களை நிகழ்ச்சி முடிந்த பிறகு தொடர்பு கொள்ள சொன்னார்.

விரிவாக வீடியோ பதிவே வரும். அப்போ எல்லோரும் தவறாமல் பாருங்க.

ஆமா...சென்னை வலைப்பதிவர் பட்டறை பற்றி சொன்னீங்களா தல? ஆரம்பம் பார்க்க முடியாததால் உறுதிப் படுத்திக்க முடியலை.

தமிழ் வலைப்பதிவுகளை இன்னொரு தளத்திற்கு முன்னேற்றும் அவரது இலட்சியத்துக்கு இது ஒரு சிறப்பான வளர்ச்சிப் படியாக இருக்கும். பாலபாரதியின் இந்த பேட்டியால் நிச்சயமாக நிறைய புதிய தமிழ்வலைப்பதிவுகள் உருவாக வழி பிறக்கும். தமிழ் வலைப்பதிவுகளுக்கு மீடியா வெளிச்சம் கிடைக்க காரணமாக இருக்கும் தல பாலாவுக்கு எல்லோரும் ஓ போடுங்க

இணையப்பக்கம் அல்லது வலைப்பதிவுக்கு பின்னணிப் படம் போடுவது எப்படி என்று பார்ப்போம்.

பிண்ணணிப் படங்களை பலவிதங்களில் இணைக்கலாம். சிறிய அளவிலான படங்கள் பக்கம் முழுவதும் டைல்களாக நிரம்பி உருவாகும் பின்னணி, நீளவாக்கில் உள்ள படங்களை இட்டு முழுப் பக்கத்துக்கும் நிரப்புவது போன்றவை பெரும்பாலும் பயன்படுத்தப் படுக்கின்றன. அது தவிர குறிப்பிட்ட படத்தை குறிப்பிட்ட இடத்தில் பொருத்தியும் பின்னணி உருவாக்கப் படுவதுண்டு.

இவற்றை எப்படி வலைப்பதிவுகளில் இணைப்பது?

பதிவின் டெம்பிளேட் எடிட் செய்யும் பகுதியில் கீழ்க்கண்ட நிரலில் ஒன்றை உங்கள் படம் இருக்கும் டைரக்டரியின் முகவரியுடன் இணைத்தால் வலைப்பதிவில் பின்னணிப் படம் இணைந்து விடும்.

உள்ளே நுழைவது முதல் அடைப்பலகை நிரல் பகுதியை அடைவது வரையிலான (html edit) விஷயங்கள் உங்களுக்கு தெரியும் தானே? இல்லாவிட்டாலும் புது புளக்கரில் தலைப்பில் படம் போடுவது எப்படி என்று பதிவர் சின்னக்குட்டி வீடியோ பதிவு போட்டு விளக்கியிருக்கிறார். அந்த வழிமுறைகளின் படி html edit பகுதியை அடைந்து அதில் நமக்கு வேண்டிய நிரலை வேண்டிய இடத்தில் இணைத்து விட வேண்டியதுதான். அவர் தலைப்பில் படம் போடுவது எப்படி என்று விளக்கியிருக்கிறார். அது ஏற்கனவே இருக்கும் தலைப்பை நீக்கி விட்டு படத்தலைப்பை இடுவதற்கான வழிமுறை. இங்கே கூறப் படும் வழிமுறைப்படி தலைப்பை நீக்காமலே தலைப்புக்கும் பின்னணிப் படம் கொடுக்கலாம்.

நிரலின் style பகுதியில் தான் நம்முடைய இந்த நிரல்களை இணைக்க வேண்டும்.

சிறிய அளவிலான படங்களை பின்னணியில் டைல் முறையில் நிரப்ப style -> body இப்படி அமைய வேண்டும்.

body{
background:url("http://www.~/~/sky.jpg") repeat-xy;
}

நீளவாட்டில் உள்ள படங்களை (உதா: 15px, 800px) பின்னணியாக்க

body {background:url("http://www.~/~/sky.jpg") repeat-x;}

உயரமாக உள்ள படங்களை (உதா: 800px, 20px) பின்னணியாக்க

body {background:url("http://www.~/~/sky.jpg") repeat-y;}

கோடிங்கை இப்படியும் எழுதலாம்

body {
background: white url("http://www.~/~/sky.jpg");
background-repeat: repeat-y;
background-position: center;
}

ஒரு படத்தை பின்னணியில் குறிப்பிட்ட இடத்தில் வைக்க

வலப்புற மேல் மூலை

body { background: url("http://www.~/~/sky.jpg") right top;}

அல்லது

body { background: url("http://www.~/~/sky.jpg") 100% 0%;}

இடப்புற மேல் மூலை

body { background: url("http://www.~/~/sky.jpg") left top;}

அல்லது

body { background: url("http://www.~/~/sky.jpg") 0% 0%;}

மேல்புற மையம்

body { background: url("http://www.~/~/sky.jpg") center top;}

அல்லது

body { background: url("http://www.~/~/sky.jpg") 50% 0%;}

மையம்

body { background: url("http://www.~/~/sky.jpg") center center;}

அல்லது

body { background: url("http://www.~/~/sky.jpg") 50% 50%;}

கீழ்ப்புற மையம்

body { background: url("http://www.~/~/sky.jpg") center bottom;}

அல்லது

body { background: url("http://www.~/~/sky.jpg") 50% 100%;}

கீழ் இடப்புற மூலை

body { background: url("http://www.~/~/sky.jpg") left bottom;}

அல்லது

body { background: url("http://www.~/~/sky.jpg") 0% 100%;}

கீழ் வலப்புற மூலை

body { background: url("http://www.~/~/sky.jpg") right bottom;}

அல்லது

body { background: url("http://www.~/~/sky.jpg") 100% 100%;}


இந்த நிரல்கள் body tag உடன் இணைக்கும் போது பின்னணிப் படமாக வருவது போலவே header image அல்லது banner image உடன் இணைத்து அந்தந்த இடத்தில் படத்தை இணைத்தால் தலைப்புக்கு பின்னணிப் படம் கொடுக்கலாம். p அல்லது div மற்றும் table டேகுடன் இணைத்துக் கூட குறிப்பிட்ட இடத்தில் படம் எப்படி வர வேண்டும் என்பதை தீர்மானிக்க முடியும். h1, h2 போன்றவற்றுக்கும் இம்முறையில் பின்னணிப் படம் இணைக்கலாம்.

body tag உடன் மட்டும் இன்னொரு சிறப்பு பின்னணி அமைப்பை உருவாக்க முடியும். இதில் திரையில் பின்னணிப் படம் நிலையாக இருக்க content ஐ மட்டும் scroll செய்து பார்க்க முடியும்.

body{ background: url("http://www.~/~/sky.jpg") gray 50% repeat fixed; }

இன்னொரு மாதிரி

body {
background: red url("http://www.~/~/sky.jpg");
background-repeat: repeat-y;
background-attachment: fixed;
}

இது மற்றொரு மாதிரி

body {
background-image: url("http://www.~/~/sky.jpg");
background-attachment: fixed;
background-position: 100% 100%;
background-repeat: no-repeat;
}

அழகான பின்னணிப் படம் போட ஆசைப்படுபவர்கள் போட்டு சோதித்துப் பாருங்கள். html edit செய்யும் போது முக்கியமாக கவனிக்க வேண்டியது முதலில் அந்த நிரலை சேமித்துக் கொள்ள வேண்டும். ஏதாவது தவறாக வந்தாலும் அதை மீண்டெடுக்க அது மிக அவசியம்.